畢爾包半和抗皇馬
每逢對賽特別集中
今晚繼續上演西超盃4強大戰，皇家馬德里喺中立場馬拉加鬥畢爾包。皇馬上周聯賽鬥完奧沙辛拿後，因惡劣天氣打亂行程，或多或少影響今仗備戰；畢爾包每逢對「銀河艦隊」都特別集中，近4次交手3次半場打和，推介半場和。（周五凌晨4時開賽）

西甲賽會原本將西超盃包裝成向外Sell西甲嘅其中一項表演性質賽事，舊年安排喺沙特阿拉伯舉行，今屆礙於疫情就留番喺西班牙踢。點知近日西班牙國內大風雪來襲，咁就對皇家馬德里影響甚大喇，佢哋上場聯賽作客奧沙辛拿，要提早一日出發，但亦因跑道積雪，全隊喺機上被困4個鐘。之後喺惡劣天氣下，皇馬作客只能同奧沙辛拿互交白卷，賽後球隊又因風雪問題未能返回馬德里，最終要喺奧沙辛拿直接飛去馬拉加備戰今場比賽，真係未比賽已經人到癲。

「銀河艦隊」鬥心成疑
如果皇馬進身決賽，佢哋就要匆匆趕去塞維利亞，變相成個幾禮拜冇得返屋企，一眾球員鬥心成疑，加上賽程咁密，究竟教練施丹會派乜人都未知，而且依家西甲前列爭得咁緊湊，即使球員落場都可能避重就輕，未必會去盡。

論肉緊程度畢爾包可能更勝皇馬，佢哋正式賽事最風光要數到1983/84年攞過西甲同西盃雙料冠軍，最近嘅冠軍獎盃係2015年西超盃決賽，擊敗巴塞隆拿封王，今場鬥心唔使懷疑。而且佢哋對「銀河艦隊」特別集中，每每以嚴密防守應付，近4次交手有3次半場打和，全部半場波膽都係0比0，估計今場都會照辦煮碗，追多次半場和冇壞。