C朗去伊朗打亞冠　包酒店使費過千萬
C朗到咗伊朗，準備亞冠分組賽為艾納斯上陣，作客柏斯波利斯，報道指艾納斯今次出行極盡奢華，單係包酒店費用耗資150萬美元(約1,170萬港元)，而亞冠盃每場獎金只係5萬美元(約39萬港元)。

艾納斯打亞冠肯定唔係為嗰少少獎金，而係要威，今次到訪伊朗，據報佢哋大軍入住當地最豪華嘅EspinasPalace酒店，用150萬美元包晒兩層客房，C朗嘅單人房有成二千幾呎，配落地大玻璃浴缸同家庭影院，奢華都極點。

場波未踢，艾納斯喺氣勢上都贏九條街，事關伊朗足球環境相對落後，據報當地球場開賽前夕仲喺度查試緊新運來嘅VAR，以取代當地相對陳舊嘅VAR設備。