上星期《東網》直播世盃外圍賽亞洲區「泰中大戰」大獲好評，今晚一於添食，仲一口氣上演直播雙料娛樂，連續睇2場大戰，包括今晚7點頭場，D組中華台北主場迎戰馬來西亞，同埋緊接晚上9點半尾場，A組印度主場鬥卡塔爾，到時蘇雞同樂比堅尼都會陪住大家。今晚由7點到11點，一於黐實《東網》，睇世盃外直播雙響炮！

Kim Sir領軍超熱血馬來西亞大有睇頭
世盃外亞洲區D組，中華台北主場迎戰馬來西亞，由金判坤領軍嘅馬來西亞，首仗主場4比3熱血反勝吉爾吉斯，今仗定必乘勝追擊，佢哋進攻意欲極強，近7場5次開3球或以上，中華台北同樣踢法進取，近4仗全開3球或以上，2.5球入球大值博。（on.cc東網周二晚7時直播）

金判坤喺香港執教長達15年，教過流浪同南華，亦係2009港隊東亞運金牌主帥，佢執教嘅球隊有幾熱血，相信香港球迷有深刻體會，Kim Sir 2022年初接手馬來西亞國家隊教鞭，進步相當明顯，近兩次熱身賽均擊敗港隊，較早前試過贏巴布亞新幾內亞10比0，上仗更以4比3反勝吉爾吉斯，攻力強勁。

中華台北進步神速
中華台北主帥加利韋特同樣曾經係港隊教練，幫港隊奪得2019東亞錦標賽出線權，佢今年初執掌中華台北教鞭，球隊不斷進步，世盃外亞洲區首圈兩回合大勝東帝汶7比0，上仗作客0比3負於阿曼腳下只因對手太強，今仗返主場勢必全力搶分，佢哋今年6月試過喺熱身賽同泰國踢成2比2，贏菲律賓3比2，今仗對住同樣來自東南亞嘅馬來西亞，大家等睇入球騷。邪神

印度卡塔爾半和角力戰
世盃外亞洲區第2圈A組，印度主場迎戰卡塔爾。兩軍上場波都旗開得勝，實力及狀態不相伯仲，印度近年足球水平有明顯進步，防守力強，要攻入其防線並非易事。至於卡塔爾作客亦不會冒進，上半場應該會以試探為主，加上卡塔爾近5場比賽有4次上半場打和，半場和博得過。（on.cc東網周二晚9時30分直播）

印度從未進身世盃決賽周，即使喺亞洲盃歷史上，成績亦只係麻麻地，不過當地近年大力投入資源發展足球，曼城母公司城市足球集團2019年收購印度勁旅孟買城，簽入不少優秀外援，其他球會亦紛紛有樣學樣，帶動整體聯賽水準上升。本土球員得到磨練，印度國家隊自然受惠，上仗世盃外作客以1比0擊敗科威特，包括上屆在內，近3場世盃外取得2勝1和，有能力與卡塔爾拉成均勢。

兩軍首戰皆勝睇準出擊
至於卡塔爾憑主辦國身份，參加上屆世盃決賽周，結果3戰全敗出局，佢哋上仗世盃外以8比1大勝阿富汗，全因對手太弱，冇參考價值。卡塔爾近3次對印度，僅取得1勝1和1負，可見卡塔爾冇明顯優勢，加上兩隊都有3分在手，出線形勢樂觀，就算打和對雙方都唔係一個壞結果，預料會出現拉鋸戰局，半和啱數。Mic少