盧卡古食大四喜　射手榜「刷」贏C朗

周一(20日)凌晨歐國外，一早已經出線嘅比利時同葡萄牙分別主場迎戰弱旅，賽前預計盧卡古同C朗拿度兩位射手榜No.1前鋒會鬥「刷」數據，結果盧卡古順利食出「大四喜」，率比利時5比0大炒阿塞拜疆，但葡萄牙2比0贏冰島一仗，C朗並冇入波，令盧卡古以14球力壓C朗(10球)排射手榜第1位。

F組比利時主場對阿塞拜疆，贏波就可以首名晉級，盧卡古喺17分鐘開紀錄，並喺20分鐘之內上演「大四喜」，李安度杜沙特完場前錦上添花，助比利時大勝5比0完場。比利時領隊泰迪斯高賽後表示：「盧卡古今場表現冇得頂，佢起親腳就一定係入波，表現完美。」

原本同盧卡古同入10球嘅C朗，喺葡萄牙對冰島一仗繼續正選上陣，葡萄牙37分鐘由般奴費南迪斯轟入世界波領先，列卡度賀達66分鐘射成2比0，C朗今仗有7次射門同3次命中目標，但始終入唔到波，無緣成為歐國外神射手，不過葡萄牙以10戰全勝嘅完美成績出線，C朗功勞極大。